سعادة الفقير

 

سعادة الفقير.. دي عكس سعادة الورزير وسعادة البيه وسعادة السفير

حد فينا سأل نفسه مرة ليه عمرنا ما قولنا سعادة الفقير ؟؟

لأنه فقير وبالتبعية مش سعيد .. والسفير والبيه والوزير أغنيا فبالتبعية سعدا ؟

ولا لما اقول للبيه "سعادتك" ابقى بدعيله يسعد فبالتبعية يسلكلي مصلحتي او حتى يصاحبني ف ابقى صاحب "سعادة البيه" ؟

طيب مش كان أولى نقول للفقير "سعادتك" تفويلاً مننا عليه يمكن يسعد ؟

طيب ما تيجي نفكر .. ليه الفقير مش سعيد ؟

عشان يا اما مش لاقي ياكل ويشرب  .. ولو أكل وشرب بالعافية مش لاقي يتعلم .. ولو أكل وشرب واتعلم مش لاقي يطور من نفسه عشان بيقى مؤهل للوظايف الخالية ..

فى الآخر هو مش لاقي حاجة (حقه أساساً) وبيدور عليها فى الصحرا الصفرا القفرا .. وحيد .. لا فيها حد يسمعه ولا وعد يبل ريقه  ولا اي تصرف من أولي الأمر يشبعه  ..

ونتيجة الأحداث الدرامية اللى معظم المصريين أبطالها وبجدارة .. بيحصل أحداث أكثر دراما وساعات بتبقى أكشن :)

تخيلوا لما واحد يبقى مش لاقي ياكل وييجي "سعادة بيه" يقولله هأكلك واقتل أمك .. والله هيقتلها

ولو واحد واكل وشارب على قده بس لامؤاخذة فى اللفظ "جاهل" .. لو جه "سعادة بيه يقولله ان المتظاهرين اوالمعتصمين او وزارة الداخلية او وزارة الدفا ع أو حتى أهله اللى بايت معاهم فى نفس الأوضة  دول عايزين يشردوك  وانا عايز احميك .. أكلك وشربك و(مخدراتك لو كان مدمن) عندي بس انزل ولعلي فيهم .. والله هينزل وهو فاكر نفسه عمرو بن العاص ..

يبقى أشد عدوين لينا فعلاً وزم نحاربهم وبشراسة وضراوة .. هما الجهل والجوع ..

الجوع اللى يخلي الواحد يبيع أمه .. مش هيبيع بلده ؟ والصراحة ليه حق هي كانت أكرمته فى ايه عشان يبقى عليها ؟

 

والجهل اللى يخلي صاحبه يصدق اي حد بيهزي ادامه (مادام بيقول كلام مش مفهوم يبقى أكيد صح :) )  .. والضلالية كتروا قوي فى يومينا دول .. وقلب الحقايق بقى سهل والجهلة كتير ..

انا مش بتكلم دلوقتي عشان أسودها فى وشي أولاً وفى وشكوا ثانياً وامشي ..

انا عايزة أغير كل اللى فى السطور اللى فاتت دي الا جملة واحدة .. "سعادة الفقير"

انا عايزة سعادة الفقير وأكيد كلنا عايزين كدة ..

هنعمل ايه عشان سعادة الفقير ؟؟

دة أهم سؤال .. واجابته بجد بجد مهمة جداً .. عندنا ايه نسعد بيه الفقير ؟

الإجابة عندنا كتييييييييير

عندنا جمعيات خيرية قد كدة عايزة تبرعات ومتطوعين

عندنا عقل يفكر فى أفكار مبتكرة تسهل على ناس عيشتهم

عندنا قلب المفروض يرق عليهم ولو بكلمة حلوة لو قابلناهم فى حياتنا

عندنا رب ندعيله  يفك كرب كل محتاج ويعافينا مما ابتلى به غيرنا ..

 

عندنا علم وثقافة نقدر ننقلها لأقرب حد نعرفه ماعندوش علم

 

عندنا حاجات كتير قوي قوي .. ما تيجوا نفكر .. وربنا هييسرلنا مادام نيتنا نصرته .. هينصرنا مافيش كلام ..

 

وأنا هبدأ دلوقتي

 

يــــــــــــــــا رب فرج كرب كل مكروب .. يـــــــــــــــــــــا رب افتح علينا بالخير اللى نقدر بيه نخم عبادك المحتاجين ..

يـــــــــــــــــــا رب استخدمنا ولا تستبدلنا .. يـــــــــــــــــأ رب اصلح نوايانا واحعلها خالصة ليك انت بس ...

 

يالا ندور على ناس نعمل فيها خير .. يالا ندور على سعادة الفقير .. :)

 

كلمتيييييين وبس :)

السلام عليكم ورحمة الله وبركاته 

ازيكم ؟ اخباركم ايه ؟ 

انشاالله تكونوا بخير ..

النهاردة انا جايبة لكم هدية .. حزروا فزروا هي اييييييييييه ؟؟؟؟

لينكات .. ايون لينكات لحلقتين لدكتور أحمد الأعور (دكتور علم نفس) بيتكلم عن التفكير وازاي نستخدم قبعات التفكير الست عملياً

تطبيق عملي لكل اللى قولناه مع بعض

الحلقة الأولي : http://www.youtube.com/watch?v=3WUXGrR9iS4&feature=BFa&  list=PLCCE034A9AE48FD64


والحلقة الثانية : http://www.youtube.com/watch?v=3WUXGrR9iS4&feature=BFa&list=PLCCE034A9AE48FD64


وأخيراً احب اتكلم عن الجندي المجهول اللى نقلنا النور دة كله (نور العلم) ..

د. شريف محسن .. هو الإنسان المحترم جداً اللى قام بـ "تعريب" الكتاب .. ايون "تعريب" الكتاب

لأنه عربه ماترجمهوش .. لو كان ترجمه حرفياً ماكنتش فهمته أصلاً .. :)

وبكدة أكون خلصت الكتاب دة الحمد لله 

واللى عنده مقترحات لكتب تانية أقرأها والخصها يلحقني بيها أنا ف عرضه :)

وشكراً على حسن المتابعة .. ودعواتكم الهي يكرمكم :) 

السلام عليكم ورحمة الله وبركاته

الأخيرة .. (الزرقاء)

السلام عليكم ورحمة الله وبركاته

الحمد لله والصلاة والسلام على رسول الله صلى الله عليه وسلم

ازي احوالكم وصحتكم ؟ يا رب تكونوا تمام وبألف صحة وعافية

النهاردة عيد النصر .. 6 أكتوبر .. كل سنة وحبيبتي (مصر) طيبة .. وربنا يعافيها من كل الشر اللى فيها ، ويقدرنا ونعالجها بنفسنا ، ويكتر خيرها ويعيد عنفوانها ومكانتها.. أشوفك عروسة يا مصر .. قولوا آمين ..

 

وحشتوني .. ووحشني ادوارد دي بونو .. ووحشتني القبعات ... 

 

عايزة اسألكم سؤال قبل القبعات .. امتى اخر مرة عملتوا حاجة بتحبوها واتبسطتوا بيها ؟

 

اللى مش فاكر امتى او فاكر والاجابة هي "من فترة كبيرة" يا ريت يعمل الحاجة اللى بيحبها وبتسعده النهاردة لو ينفع .. او يحطها فى الخطة فى اقرب وقت ممكن ..

ويــــــــــــــا سلاااااااااام لو الحاجة دي هتنفع غيره .. يبقى هتبقى حاجة هو بيحبها والناس بتحبها وربنا بيحبها .. وهتبقى البركة فيها تريبل (treble) .. ثلاثية يعني

 

واعرف ان لو ربنا سمحلك تعمل خير .. يبقى أراد يأجرك ويكرمك بيه .. يعني حب منه ليك انت تحديداً .. فكر كدة .. ربنا بيحبك انت واختارك انت عشان ينفع بيك حد .. ياااااااه !!

 

نرجع لموضوعنا .. "قبعات التفكير الست" ..

 

النهاردة اخر قبعة .. خلاص هنخلص .. بس انا مش هسيبكوا ..

 

بالنسبة لخريطة التفكير الشاملة .. عشان نكونها وتبقى فعلاً شاملة لازم تتضمن تفكير عاطفي بحت ، وتفكير موضوعي بحت برضو ، وتفكير متفائل ، وآخر متشائم ، وشويتين إبداع .. وحاجة مهمة جداً جداً كمان

 

الحاجة دي هي موضوعنا النهاردة ..

 

 

 

 

القبعة الزرقــــاء :

 

الأزرق هو لون السماء التى تغطي كل شئ .. لهذا تم اختيار اللون الأزرق للقبعة المعنية بالسيطرة والتنظيم والرؤية العامة .. والسيطرة هنا يقصد بها السيطرة على عملية التفكير ذاتها .. وعلى الجلسات التى يدار فيها النقاش وتطرح خلالها الأفكار ..

 

فمن اهم مسئوليات تفكير القبعة الزرقاء ان يحافظ على التركيز أثناء المناقشة على القضية محل النقاش والا يبتعد الحاضرين عن الهدف المرغوب من كل مرحلة فى الجلسة .

 

ومن الأدوات التي تساعدنا على التركيز "طرح الأسئلة" وكلما كانت محددة كانت أكثر فائدة .. فالأسئلة فى هذا الصدد نوعان (كما صنفها الكاتب):

1. أسئلة الصيد الحر (Fishing Questions) : وهي أسئلة عامة ويصعب توقع إجاباتها.
2. أسئلة الرماية الموجهة (Shooting Questions) وهي أسئلة  غاية فى التحديد وتكون الإجابة عليها بـ "نعم" أو "لا" .

والنوع الثاني من الأسئلة هو المطلوب لأنه أيضاً يوفر الوقت ..والفعالية (الفعالية يعني تحقيق المطلوب بالظبط فى وقته بالظبط)  هنا هي اهم الأشياء المرغوب فيها . 

 

وأيضاً التنطيم من مسؤليات مرتدي القبعة الزرقاء ..

 مثلاً ( نحن الآن بحاجة لسماع تفكير القبعة الحمراء ...

 حسناً فلنرتدي القبعة الخضراء الآن لنفكر فى الأمر ....

هذا دور القبعة الصفراء فعلينا تأجيل ارتداء القبعة السوداء لوقت لاحق... وهكذا )

 

وعليه أيضاً التأكد من أن قواعد لعبة "قبعات لتفكير الست" تطبق بشكل سليم ، فهو "المخرج" الذي يصمم الخطوات التي يجب أن تتم ، وأيضاً "الناقد" الذي يتابع ما يحدث .

 

وبم ان تفكير القبعة الزرقاء معني بالسيطرة والتنظيم .. فعلى رئيس الجلسة ان يرتديها معظم الوقت ، وهذا لا يعني انها من اختصاصه هو فقط .. ولكنه هو المسئول بالدرجة الأولى عن التنظيم والسيطرة على النقاش .

 

على مفكر القبعة الزرقاء ان يقول لأعضاء الجلسة بمنتهى الوضوح "هذا هو الهدف ، صوبوا تفكيركم تجاهه"

وعليه أيضاً ان يحدد مهام محددة للتفكير ، وأن يلخص ما وصل اليه النقاش من وقت لآخر ويقدم رؤية عامة لما تم انجازه ، ويرصد قائمة البدائل التي تم توليدها خلال الجلسة .

 

من أهم وأقوى أدوار مفكر القبعة الزرقاء أن يقوم بفض النزاعات الجدلية بين أعضاء الجلسة .. وذلك عن طريق رجوعه للحقائق التى تم التحصل عليها من تفكير القبعة البيضاء .. وعلى ضوئها يحكم من منهما على صواب ومن على خطأ .. وان لم يصل لقول فصل يفصل فى النزاع ، فعليه ان يدرج المقترحين على انهما صحيحان (وجهتي نظر مختلفتان)

 

يعني من الآخر الراجل دة بيقعد ينظم الدنيا .. واي حد بيبعد عن الموضوع بيرجعه هو تاني .. بيسيطر (زي تايجر) ويجيب م الآخر يعني ..

وبكدة يا شباب نكون خلصنا الكتاب

ونقدر نعمل خريطة تفكير تخلصنا من العذاب

ونستخدم كل مهاراتنا ونشيل من عليها التراب

 

والحمد لله رب العالمين

 

ماخلصناش كلام عن التفكير لسة .. بإذن واحد أحد هنعقب على الكتاب فى مقالتين كمان نحاول بيهم نربط القبعات ببعض ونلم الأفكار فى دماغنا عشان نستفيد بيها عملياً

 

لو حد استفاد يدعيلي ولو حد ماستفادش يدعيلي اعرف افيد :)

 

والسلام عليكم ورحمة الله وبركاته

قرأت لكم .. (القبعة الخضراء 2 )

السلام عليكم ورحمة الله وبركاته

ازيكم يا رجالتنا وبناتنا .. اخباركم ايه ؟

ان شاء الله تكونوا بخير وكويسين وصحتكم بمب وحاجات كتير (كويسة) فوق بعض

هنكمل مع بعضينا النهاردة

 "القبــــعةالخضـــــراء"  :

اتكلمنا عن الابداع والتفكير خارج الصندوق ، وكمان اتكلمنا عن التفكير الجانبي وانه من اهم أدوات التفكير الإبداعي ..

نبدأ ؟  يالا ..

قد تحدث بعض الاكتشافات العلمية نتيجة تفكير منمق منطقى وخطوات متتالية ، وقد تحدث نتيجة أخطاء غير مقصودة .. كما تم اكتشاف المضاد الحيوي عندما ترك احد أطباق عينات البكتيريا نعرضاً للهواء فتكون فيه فطر "البنيسيليم" والذي منع نمو البكتيريا حوله ..

هذا الحدث سبب  إثارة ذهنية للشخص الذى واجهه ففكر خارج القوانين المعروفة ومن هنا "فهم" الاكتشاف الجديد وأدركه . (واحد غيره كان قال دة شغل عفاريت)  

قد تسبب لنا الطبيعة استثارات ذهنية تجعلنا نفكر بشكل مختلف ، ولكن تفكير القبعة الخضراء يتطلب منا أن نحدث استثارت ذهنية لأذهاننا بأنفسنا بطريقة مدروسة .


وعند تقديم فكرة مبتكرة نريد حمايتها من هجوم مرتدي القبعة السوداء .. فباستطاعتنا استخدام كلمة "بو" "PO" وهي اختصار "provacative operation" او عملية التحفيذ ، وذلك قبل الإدلاء بالفكرة

مثلاً .. "بو" .. لابد أن تهبط الطائرة على ظهرها
        "بو" .. لابد أن ندفه نقود للزبائن عند شرائهم بضائع من المتاجر

وهكذا ...


ويوجد بـ"التفكير الجانبى" تقنيات لتحقيق التحفيز الذهني :

• ان نعكس الطريقة التي يحدث بها لشئ
• ان نستخدم كلمة عشوائية ونحاول ربطها بالفكرة محل النقاش .. وقد نحصل على هذه الكلمة من القاموس مثلاً (ومن المفضل أن تكون اسم وليس فعل) .

(فى ناس بتعتقد ان "العشوائية" ماتنفعش فى حل المشاكل .. مع ان الحاجة العشوائية دي هى اللى مالهاش علاقة مباشرة بالموضوع محل التفكير .. ومن هنا تيجي اهميتها ، اهميتها فى ان مالهاش علاقة مباشرة باللى انا بفكر فيه .. عشان تفتحلي مجال جديد للتفكير اقد من خلاله اوصل لنتايج جديدة )

من وظائف تفكير القبعة الخضراء ان يجد كل البدائل لحل المشكلة .. وأقصد بـ "كل" هنا البدائل المنطقية وغير المنطقية .

وييجي السؤال المهم آخر حاجة ..

هل الإبداع مهارة يمكن اكتسابها ام موهبة يتمتع بها بعض الأشخاص دون الآخرين ؟

الإجابة ببساطة .. الاتنين ..

أي لا يجوز ان يقول أحدنا "أن الإبداع هبة تعطى لأناس دون غيرهم ، وأنا لم أعطى هذه الهبة ولن أقدر على الإبداع" (الكلام دة لو تسمحولي اسمه استسهال وصاحبه مش عايز يحاول)
ولكن قد يتميز بعضنا فى الإبداع على البعض الآخر .. وهذا التميز سببه الموهبة ..

(مثلاً .. كلنا نقدر نلعب تنس ، بس مش كلنا هانوصل للنهائي فى اي بطولة ، ومش كلنا هيلعب فى ويمبلدون ، وواحد بس اللى هيكسب ويمبلدون)

شوفتوا بقى ان الاجابة هي  "الاتنين" ..

يعني الموهوب هيتميز شوية واللى مش موهوب هيأدي أداء يشكر عليه ..

وبكدة نكون خلصنا القبعة الخضراء والحمد لله

 

نتقابل المرة الجاية مع اخر قبعة .. ومش هاقولكم لونها ايه .. بس

 

والسلام عليكم ورحمة الله وبركاته

 

قرأت لكم .."القبعة الخضراء" ..(1)

السلام عليكم ورحمة الله وبركاته

 

ازيكم ؟ اخباركم ايه ؟

يا رب تكونوا فى احسن حال وماتكتفوش بكدة ، وتطمحوا للأحسن دايماً ..

 

 

مكملين رحلتنا مع القبعات الست .. وهنتكلم النهاردة على القبعه قبل الأخيرة  .. قربنا نخلص .. وان شاء الله لما نخلص هحاول انى اوصل الفكرة فى أمثلة عملية .. والله الموفق والمستعان .

 

خلصنا موضوعية وعاطفية وسوداوية وتفاؤل .. ندخل على الخيال بقى والإبداع والكلام الكبير ..

 

القبعة الخضراء :

 

القبعة الخضراء مسؤلة عن التفكير الإبداعي والخيالي أثناء انشاء خريطة التفكير الشاملة ، أو باللغة الإنجليزية "To think out of the box" (تفكر خارج الصندوق)..

 

يحاول مرتديها التفكير فى حلول غير البديهية المستهلكة من قبل الآخرين .. يبحث عن كل ما هو جديد وغير تقليدي للحصول على نتائج أفضل .

 

ولا يعني هذا بالضرورة أنه عندما يرتدي المفكر القبعة الخضراء سوف يصل فى الحال الى كل ما هو مختلف ومبتكر وجديد .. ولكن حسبه المجهود الذي يبذله فى البحث عن الجديد ، والوقت الذي يخصصه لهذا ..

 

وهذا هو الغرض الحقيقي من ارتداء القبعة الخضراء .. تخصيص وقت للتفكير خارج الصندوق .. وبذل مجهود والقيام بعصف ذهني للوصول للجديد .. والأفكار سوف تنمو يوماً بعد يوم .

 

وهناك شئ مهم لابد من استخدامه للوصول لأفكار ابداعية ... ألا وهو :

 

التفكير الجانبي  "Lateral Thinking" :

 

هو معني تحديداً بتغيير الإدراكات والمفاهيم المسئولة عن تكوين الخبرات داخل العقل البشري وتحويلها لنماذج يقارن بها المستجدات وتقبل أو ترفض على أساسها .

وهذا هو ما يفعله العقل ويصل لحلول تقليدية .

 

أما ما يفعله التفكير الجانبي هو السيرعرضياً ليقطع تلك النماذج من الأجناب ، ومحاولة خلق نماذج جديدة تتغير بها المفاهيم والإدراكات ، وتتوالد من جراء ذلك الأفكار الجديدة ويثمر الإبداع .

 

(يعني مثلاً لو كانت الشركات اللى بتصنع موبايلات اعتقدت ان الوبايل دة منتج للأغنياء فقط لأن سعره غالي وتكاليفه كتير .. ومافكروش خارج الصندوق وتعاملوا مع فكرة  "الفقير مش بيشتريه عشان غالي"  بطريقة تقليدية  >> "يبقى الغني بس اللى هيشتريه" كان التعامل كالآتي >>"ايه المشكلة اننا نصنع واحد رخيص للفقراء؟" )

 

 

مثال على ذلك ..

اذا كنا بصدد انشاء حديقة حيوان جديدة ، ونحتاج لأفكار ابداعية لنجذب الزوار .. الطبيعي هنا أن يحضر لذهنك الصور التقليدية لحديقة الحيوان .. حيوانات داخل أقفاص ، شجر ونباتات ، ومساحات يتحرك بها الزوار ليشاهدوا الحيوانات بالأقفاص ...

 

ولكن فكر القبعة الخضراء يأتي لينحي التقليدية جانبـــــاً .. "الزوار يشاهدون حيوانات داخل أقفاص" .. ولماذا لا يحدث العكس ؟!!

الزوار فى أقفاص يشاهدون الحيوانات حرة بالحديقة .. قد يبدو جنون ولكن .. لما لا ؟

 

لم لا تخصص عربات توفر الحماية الكافية للزوار ، يسيروا بها وسط الحيوانات الحرة ، ففى ذلك راحة لنفسية الحيوانات ، ومتعة أكثر للمشاهدين حيث يروا الحيوانات تتحرك بطبيعية وتلقائية ، ويجربوا تجربة شيقة ومثيرة ..

 

ولابد أن نبحث فى إمكانية تطبيق الفكرة وإحداثها لتغيير بدلاً من الاكتفاء بالحكم على صاحيتها او عدمها ، وذلك بالإجابة على الأسئلة التالية :

1. ما المثير فى الفكرة ؟
2. ما المختلف فى تلك الفكرة ؟
3. ماذا تقترح ؟
4. الى ماذا تؤدي ؟

 

فأفكار القبعة الخضراء قد تبدو مجنونة للوهلى الأولى ، فلا بد من التفكير فيها قبل رفضها .

كفاية علينا كدة النهاردة

بأمر الله نكمل المرة الجاية

 

والسلاك عليكم ورحمة الله وبركاته

مكملين ..

السلام عليكم ورحمة الله وبركاته

الحمد لله والصلاة والسلام على رسول الله (صلى الله عليه وسلم)

 

مكملين مع القبعات الستة اللى بعد ما نفهمها ان شاء الله هنعرف ازاي نعمل خطة تفكير شاملة .. وبالتالي ناخد قرارات صحيحة على أساس سليم ..

هنجاوب النهاردة على سؤال مهم جداً :

هل نبحث أولاً عن السلبيات أم الإيجابيات ؟

قد يقول الشخص المجادل ان القبعة السوداء ينبغي دائماً أن تأتي أولاً ، وبالتالي يمكن رفض الأفكار غير الصالحة من البداية بسرعة دون اضاعة الوقت فى تناولها من أكثر من جانب . (والطريقة دي بيفكر بيها عدد كبير من الناس، هى تبان طريقة سريعة وفعالة بس هي بتنفع لو احنا أقصى طموحنا اننا نحل الأزمة دلوقتى ، مش اننا نتطور ونحقق انجازات ) .

 

ولأنه من السهل رؤية عيوب أي مقترح جديد عن رؤية إيجابياته ، فإننا اذا استخدمنا تفكير القبعة السوداء أولاً على المقترح فإنه لن يستمر معنا بعد ذلك ، فبمجرد أن يتم توجيه العقل نحو السلبيات من الصعب جداً رؤية الإيجابيات بعد أن أصبحت كيمياء المخ كيمياء تخوف وحذر .

 

وأؤكد هنا أن ارتداء القبعة الصفراء أولاً واجب على كل فرد وليس فقط على من يريد ذلك .

 

ويدعي البعض أنه اذا استخدمنا تفكير القبعة السوداء على فكرة وظلت بعدها على قيد الحياة ستكون بالضروره فكرة جيدة واستخدام تفكير القبعة الصفراء عليها "تحصيل حاصل" لأنها بلا عيوب .

هذا الادعاء مبنى على تصور كاذب ، لأنه يرى أن مميزات أي فكرة تظهر عندما تفحص توافقها مع اطار تحكيمي تقليدي نختاره  (يعني بحكم على الفكرة مثلاً من خلال خبرات سابقة بس .. "احنا زودنا الإعلانات عن منتجنا من سنتين وخسرنا  يبقى مش هنزود الإعلانات تاني عشان دة بيخسرنا" .. طبعاً دة غلط . هو ظروف السوق دلوقتي زي من سنتين ولا عقلية وثقافة المستهلك دلوقتى زى من سنتين ؟ .. طبعاً لا .. مع اننا لو دورنا على ايجابيات فى الفكرة هنلاقى ان فرص الربح زادت .. ممكن نعلن عن منتجنا على الفيس بوك .. استخدام الفيس بوك زاد جداً بعد ثورة 25 يناير .. ودي فرصة .... ولو اختارنا فكرة مبتكرة تعلم مع الناس للإعلان الجديد ممكن يزود المبيعات ... وهكذا
بس التفكير الإيجابي عامة بيحتاج ان الواحد يفكر فى الموضوع من كذا جهة ، ويستخدم خياله الخصب فى استكشاف وتخيل الأوضاع فى المستقبل )

 

وبمجرد أن تتبلور الفكرة ومميزاتها سيأتى دور تفكير القبعة السوداء ويتم بطريقتين :

الأولى : أن أطرح عدة أسئلة منها :

• هل تلك الفكرة قانونية ؟
• هل يمكن لها أن تتحقق ؟
• هل هناك فوائد سوف تتحقق من خلالها ؟

والسؤال عن الفوائد هنا مهم جداً لأنه اذا لم تكن هناك فوائد للفكرة فإن هذا يعني أنها غير قابلة للتنفيذ عملياً .

 

الثانية : تأتي بعد الأولى وهدفها هو "كيف يمكن تحسين الفكرة بعد الإشارة للأخطاء التي بها "؟

 

ان تحسين التصميم من الاستخدامات الإيجابية لتفكير القبعة السوداء ، وتحسين التصميم لن يتم بمجرد ازالة مشكلاته ، ولكن بمحاولات تحويل المشكلات لفرص نستفيد منها .. وهذا فى الحقيقة (تحويل التهديدات لفرص) يحتاج لخليط من تفكير القبعة الصفراء والقبعة الخضراء (كما سنرى فيما بعد) .

 

كفاية علينا كدة النهاردة .. وألتقي بيكم ان شاء الله المرة الجاية ونلبس كلنا "القبعة الخضراء "..

 

والسلام عليكم ورحمة الله وبركاته

قرأت لكم .. (القبعة الصفــراء)

السلام عليكم ورحمة الله وبركاته

ازايكم عاملين ايه ؟ يا رب تكونوا تمام وبخير

جمعة مباركة على الجميع .. وربنا يتقبل منا جميعاً صالح الأعمال ..

أكثروا من الدعاء لعل ساعة الاجابة تكون الآن .. ادعوا لنفسكم بكل ما تشتهوا ، وادعوا ان ربنا يعز الإسلام ويهدي المسلمين وغير المسلمين للحق والعدل ، وادعوا لأبويكم ولكل من تحبوا بكل ما تحبوا (وتأكدوا ان لكم المثل)

 

واسمحولى أنا عندي فكرة عشان نرد الإساءة الموجهة للنبي محمد (صلى الله عليه وسلم) 

اللى فينا مايعرفش عنه كتير يحاول يعرف أكتر ويتخلق بأخلاقه .. واللى فينا يعرف عنه كتير ومتخلق بأخلاقه يعرف كل الناس اللى حواليه عن خلق النبي الكريم صلى الله عليه وسلم ، حيث "كان خلقه القرآن" كما قال الله عز وجل .

أنا بقول كدة عشان انا عارفة ان اقوى طريقة تأثر بيها فى غيرك وتغير سلوكه وأفكاره بيها انه يشوفك بتعمل الصح ومبسوط بيه ، بتدي ومش مستني رد ، بتحب من غير شروط ، بتاخد حقك من غير افترا ، لما بتقدر بتعفي ، لما بتحكم بتعدل ، لما بتتكلم بتصدق .... وغيرها كتييييييييييير أخلاق لازم نتحلى بيها (وبقول لنفسي قبلكم) .. أكيد الرسول هيفرح لما يشوفنا بنعمل كدة .. وهيحس انه ساب رجالة تستحق شفاعته وانها تكون معاه فى الفردوس الأعلى ..  

 

اتكلمنا كتير .. نرغي بقى ..

 

نرجع لكتاب "قبعات التفكير الست" .. اتعرفنا على 3 قبعات لحد دلوقتى .. اللى فاكرهم يكتبهم فى كومنت ويبقى جازاه الله كل خير ، واللي مش فاكرهم يرجع للمقالات السابقة ، ويبقى جازاه الله كل خير برضو

 

النهاردة هنتكلم عن :

 القبـــعة الصفـــراء :

 

بم أن الأصفر هو لون الشمس ، لون مشمس وإيجابي ، اختاره الكاتب (ادوارد دي بونو) للقبعة التى تعبر عن التفاؤل والتفكير فى كل ما هو ايجابي .

 

فهي نقيد القبعة السوداء .. تختص "بالبحث" عن النواحي الإيجابية . وسميت تحديداً "قبعة التطلع للإيجابي" بما يعنيه ذلك من نظرة الى المستقبل ، ويمكن ايضاً ان توجه النظرة الإيجابية لأمور حدثت فى الماضي للخروج بتفسيرات ايجابية .

 

والتفكير فى الإيجابيات يحتاج منا نفس دقة وانضباط وتدريب القبعة البيضاء ، لأن الإيجابيات قد لا تظهر من الوهلة الأولى .. فقد تحتاج الى ان نقدح زهننا ونفكر مراراً حتى نصل اليها .

 

ويأتى هنا سؤال مهم . :

 

عند أي نقطة يتحول الأمل الى سذاجة ؟ وهل لا يجب أن يعتني تفكير القبعة الصفراء بدرجة رجحان حدوث الإيجابيات ، أم هذا من اختصاص القبعة السوداء؟

 

مفتاح الإجابة يتمثل فى الفعل الذي يلي التفاؤل ، فإذا كان يترتب عليه قرار يقع كبديل ضمن بدائل عدة فلا بد ان نكون حذرين فى فحصنا للرؤية التفاؤلية (يعني لو كنا هنختار بين بديل فيه تفاؤل زايد وبين بدائل كتير، وهو قايم على أمل مش واقعي ومحتاج معجزة عشان يحصل .. المفروض نختار اللأقرب للواقع  أضمن .. لأن التفاؤل فى الحقيقة نوعين :

تفاؤل زايد عن الحد ومش واقعي ، وتفاؤل مبرر منطقياً وعلمياً .. والمفروض ان تفكير القبعة الصفراء يبقى بين دة ودة .. وسط يعني )

 

للقبعة الصفراء شق آخر غير التقاط الايجابيات من الأفكار .. وهو "التفكير البناء"

وهو المعني بتقديم مقترحات بناءة .. وهو معني بفاعلية الأفكار حتى لو كانت قديمة ، فليس الهدف منه هو ابداع أفكار جديدة ، فذلك هو دور "القبعة الخضراء" .

وبكدة نكون خلصنا القبعة الصفراء .. المرة الجاية هنجاوب سؤال مهم ..

"هل نبحث عن السلبيات أولاً أم الإيجابيات أثناء تكوين خريطة التفكير الشاملة ؟"

 

وأسفة جداً على الإطالة

والسلام عليكم ورحمة الله وبركاته

 

قرأت لكم .. (السوداء 2 )

السلام عليكم ورحمة الله وبركاته

 

مكملين قبعتنا السوداء النهاردة .. وآسفة جداً انى اتأخرت عليكم يومين بس والله لظروف خارجة عن ارادتي ..

 

نكمل ؟ .. يالا نكمل :

 

القبعة السوداء

 

قد يرى شخص أن تشديد العقوبات يقلل نسبة الجريمة (المثال اللى ذكرناه فى الجزء الأول) وقد يرى الآخر غير ذلك ، ولكن ما يفصل بينهما فى هذه الحالة الرجوع للحقائق (تفكير القبعة البيضاء) ، وان كان ما يرونه ضعيف وغير مؤكد عليهم بوضعه فى خريطة التفكير على أنه "مجرد رأى" قد يأخذ به من يستخدم الخريطة أو لا يأخذ به .

 

وقد تم تقديم الحقائق (من خلال تفكيرالقبعة البيضاء) ، ومن خلال القبعة السوداء يتم تحدي تلك الحقائق من حيث مصداقيتها وجدواها فى المستقبل ، وهذا هو أبسط وأوضح أدوار القبعة السوداء .. فعند اظهار ان بعض الحقائق غير ملائمة قد تتغير بعض القرارات المبنية على تلك الحقائق .

 

(ودة لازم يتم بشكل منطقى وبأسباب واضحة .. وبالتالي مش معناه هو التشكيك فى أي حقيقة نقابلها ، لكن لو في حقيقة ادامنا مشكوك فيها او فيها نقاط ضعف نظهرها "بموضوعية" .. لأن النقد واظهار السلبيات أسهل كتير من اقتراح حلول مبتكرة ، والناقد وقت ما بيطلع "القطط الفاطسة" فى المقترحات او الموضوعات بيبقى شايف انه بيعمل خدمة للمجتمع ودي مش حقيقة ، الحقيقة ان لو مافيش ضرر ملموس ومدعم بحقائق موثقة يبقى المقترح او الموضوع محل الدراسة قابل للتحقيق ، ماهو مش نقد للنقد )

 

وييجي هنا سؤال مهم جداً :

 

كيف يمكن التعامل مع السلبيات التى يأتي بها فكر القبعة السوداء ؟

 

أمامنا خمس طرق ..

1. أن تلاحظ النقاط السلبية وتعترف بها.
2. أن توضح الرؤية السلبية وتضيف أن نتائجها شئ بعيد الحدوث.
3. أن تعترف بوجود خطأ ما وتضع خطوات لمواجهته.
4. أن تنكر قيمة الخطر المذكور أو بمعنى آخر تمارس فكر قبعة سوداء مضاد لفكر القبعة السوداء الخاص بالآخرين.
5. ان تقدم رؤية بديلة تسير جنباً الى جنب مع رؤية القبعة السوداء المقدمة.

 

وبكدة نكون خلصنا القبعة السوداء بسلام .. ونتقابل المرة الجاية مع قبعة جديدة متقائلة وسعيدة "القبـــعة الصفـــراء" ..

 

والسلام عليكم ورحمة الله وبركاته

 

قرأت لكم .. (السوداء .. )

السلام عليكم ورحمة الله وبركاته

ازيكم يا شباب ، ويا بنات طبعاً .. اخباركم ايه ؟

ان شاء الله تكونوا بألف خير وصحة وسعادة ..

تعرفنا على القبعة البيضاء (حيث الحياد والموضوعية ) والحمراء (حيث العاطفية واللاعقلانية ) .. دلوقتي بقى هنلبس قبعة جديدة ..

القبـــــعة الســــــوداء

وهي المسئولة عن التفكير فى السلبيات وايجاد الأخطاء والأشياء الخاطئة فى الموضوعات محل الدراسة ، ولكن لابد وأن تكون تلك السلبيات والأخطاء مبررة منطقياً وليس عاطفياً ، فينبغى أن تكون التبريرات قادرة على الصمود بمفردها ، مكتوبة بطريقة هادئة وعاقلة .. لأنها لو سلبيات غير مبررة منطقياً سوف يمون موقعها تحت القبعة الحمراء .

 

وعلى الرغم من أنها تتطلب من مرتديها التفكير فى السلبيات واظهارها .. الا انها لا تعطيه الشرعية للتفكير المطلق فى السلبيات فقط . فالشخص الذي لا يفكر الا فى السلبيات بطبيعته سيظل تفكيره متخذاً هذا الطريق طوال الوقت ، ويكون دائما جاهز للانقضاض والهدم .

 

ولكي تكون السلبيات التى نتحدث عنها منطقية .. سنذكر بعض القواعد المنطقية العملية التى ستساعد فى تبرير السلبيات :

1. هل وجهة النظر أو الرؤية تلك مبنية على قاعدة صلبة من الأسباب والتعليلات المنطقية ؟
2. هل تؤدي تلك الرؤية لهذا الاستنتاج المقدم بالتبعية ؟
3. هل لابد أن تقود تلك الرؤية لذلك الاستنتاج أم أن ذلك ليس شرطاً؟
4. هل هناك استنتاجات أخرى محتملة ؟

 

مثال :

 

رؤية : "اذا أطلنا مدد حبس المجرمين وشددنا عقوباتهم فإن ذلك سوف يقلل الجريمة"

 

هي رؤية تبدو منطقية بدرجة كافية ، وقد يتبعها ذلك الاستننتاج "هبوط معدل الجريمة" حقاً ، ولكن ليس ذلك أمراً لا بد منه في جميع الأحوال (اجابة السؤال الثالث) ، فاذا كانت وسائل القبض على المجرمين ضعيفة لن نصل الى الغاية المرغوبة (الاستنتاج)...

... ونكمــــــل القبعة السوداء بكــــرة ان شــــــاء الله

والسلام عليكم ورحمة الله وبركاته

 

قرأت لكم .. (القبعة الثانية)

السلام عليكم ورحمة الله وبركاته

ازيكم يا شباب عاملين ايه ؟
يا رب تكونوا تمام وزي الفل ..  

مكملين مع بعض رحلتنا جوا كتاب "قبعات التفكير الست" لـ "ادوارد دي بونو"

واتعرفنا امبارح على القبعة البيضاء .. بتعبر عن اي نمط من أنماط التفكير ونستخدمها ازاي وليه ..

وبعد ما عرفنا الحقائق بشكل موضوعي محايد (باستخدام القبعة البيضاء) .. نبدأ دلوقتى ننحي الموضوعية جانباً ونفسح المجال للعاطفة غير المبررة إطلاقاً .. نخلع القبعة البيضاء .. ونرتدي :

 

القبـــعة الحـمـراء

خصصت القبعة الحمراء للعواطف والأحاسيس والجوانب اللاعقلانية فى التفكير ..

فعند ارتدائها تقوم بذكر كل ما تشعر به (سواء ايجابياً او سلبياً) دون تبرير أو ذكر سبب .

 

(يعني تقدر تقول انا متضايق من فلان من غير مبررات مفهومة .. او مش عايز ادخل فى الشراكة دي عشان مش مرتاح .. وأشياء من هذا القبيل )

 

وللعواطف أهمية كبيرة في عملية إنشاء خريطة تفكيرية شاملة وبالتالي في عملية اتخاذ القرار .. فلابد وأن يعتد بها وأن يعبر عنها بشكل واع وواضح لثلاثة أسباب :

 

1. لأنها اذا لم تظهر ستظل بداخلنا سوف  تنتقل الى العقل الباطن وتحركنا دون ان ندري , أو ستؤدي الى انفجار .
2. لأننا اذا كانت لدينا مشاعر سلبية تجاه شئ ما أو شخص ما (غيرة ، غضب ، كره ..) فلابد من أن نسعى لتغييرها وذلك عن طريق تغيير إدراكنا للمواقف (تغيير تفسيرنا لتصرفات غيرنا او الأحداث اللى حوالينا) .. لأن إدراكنا للمواقف هو الذي يحرك مشاعرنا ويحدد طبيعتها ..

(مثلاً مثلاً .. لو حد شتمك فى الشارع .. وانت فسرت الموقف على انه أهانك فى صميم شخصيتك امام الناس اللى فى الشارع ، فطبعاً على ضوء هذا التفسير (الادراك) "هتتضايق جداً وتثور" ويا تشتمه يا تضربه يا هتكتم غيظك جواك وتحس انك مهزوم ... مع انك لو أدركت الموقف وفسرته على ان الشخص دة غلبان ، دة عنده بدل المشكلة 3 أو 4 .. عصبي ومش بيتحكم فى نفسه .. وقد يكون عنده مصيبة تسببت فى عصبيته دي .. وانه اصلا مايعرفكش شخصياً عشان شتيمته تعني لك شئ .. وتتخيل الذنب اللى اتكتبله فى صحيفته عند ربنا.. هيصعب عليك و"هتتعاطف معاه" وتدعيله ربنا يزيح عنه .. )

 

شوفت الفرق ؟!!!

 

3. عندما يرتدي الشخص القبعة الحمراء ويبداً فى التعبير عن مشاعره سوف يكتشف مناطق الحساسية العالية لديه فى الأمور .. فيتلافاها عند اتخاذ القرار .

 

• تحت القبعة الحمراء يمكننا استخدام "الحدس" أيضاً .. والحدس هنا يعني الفهم الفوري للموقف والحكم السريع عليه نتيجة خبرات متراكمة ، وهي عملية معقدة وسريعة جداً ويصعب تفسير اسباب واضحة لها . فمن الممكن ان نعتبر الحدس مجرد مرشد قد يصيب وقد يخطئ .. فهو شئ ملموس يعتبر جزء من عملية التفكير .
• تساعد القبعة الحمراء المفكر فى أن يستحضر مشاعره وييستبعدها فى غضون دقائق .. مما يجعل البعض يراها مصطنعة ، وفى الحقيقة أن قيمتها تكمن فى ذلك .

      فالعواطف فى الوضع العادي تأخذ وقتاً لتظهر ، ووقت أطول لتختفى ..

 

كما أن استخدامها مع الآخرين يجعلها أقل حرجاً وشخصنة (يعني لو قلت فى اجتماع مثلاً "انا لما ألبس القبعة الحمراء هيكون إحساسي ان فكرة أحمد مش مفيدة " هتكون أخف شوية من انك تقول "يا أحمد فكرتك دي مش مفيدة ومش مريحاني بصراحة" )

لأن الكل يعلم أنه مجرد دور رمزي يلعبه مرتديها بطريقة مصطنعة .

 

وبعد أن تتضح  الخلفية العاطفية للأمور محل النقاش يصبح من المفيد ان نتخيل خلفية عاطفية أخرى ، ورؤية كيف ستكون الأمور وقتها .. 

 

وبكدة نكون خلصنا الكلام عن القبعة الحمراء وعرفنا وظيفتها وفايدتها

نتقابل بكرة ان شاء الله مع قبهة جديدة

والسلام عليكم ورحمة الله وبركاته

قرأت لكم .. (القبعة الأولى)

السلام عليكم ورحمة الله وبركاته
يوم جديد يا رب يكون سعيد علينا جميعاً ..

بدأنا نتكلم عن "قبعات التفكير الست" لـ "ادوارد دي بونو" امبارح .. وقولنا الغرض من استخدامها وكمان اننا محتاجين نفهم معنى "التقمص" عشان نقدر نطبقها ..

• ست ألوان لقبعات التفكير الست :

البيضاء والحمراء والسوداء والصفراء والخضراء والزرقاء

كل قبعة منهم معنية بنمط من أنماط التفكير 

1. البيضاء : معنية بالتفكير المحايد الموضوعي ، أي الحقائق والرسومات التوضيحية .
2. الحمراء : مسئولة عن التفكير العاطفي البحت ، أي وجهة النظر العاطفية غير المبررة .
3. السوداء : وهي مسئولة عن التفكير السلبي ورؤية الجانب المظلم للأمور .
4. الصفراء : هي قبعة الإيجابية والتفاؤل , فمن يرتديها يبحث عن كل ما هو جيد فى الأمور.
5. الخضراء : تشير الى الإبداع والأفكار الجديدة المثمرة .
6. الزرقاء : معنية بالسيطرة والتنظيم لعمليات التفكير ، حتى لا يطغى دور قبعة على الأخرى .

ويمكنك أن تربط ألوان القبعات لتكون ثلاثة أزواج :

الأبيض والأحمر : الحياد والعاطفية
الأسود والأصفر : الإيجابية والسلبية
الأخضر والأزرق : الإبداع والنظام

ودلوقتى هنبدأ .. مستعدين ؟؟


القـبــــــــعة البــيــــــــضاء

القبعة البيضاء هي قبعة الحقائق والرسومات التوضيحية  ، فاللون الأبيض يشير الى الحيادية وعدم التحيز، من يرتديها يلعب دور الكمبيوتر ، أي يقدم الحقائق التى تطلب منه بحياد وموضوعية (كما هي دون ي اضافات) ..

 

(يعني مثلاً لما حد يقول ان الزحمة بتزيد فى شوارع القاهرة كل يوم من الساعة 2 الظهر الى الساعة 8 بالليل .. دي حقيقة ، انما اول ما يبدأ يقول "متهيألي دة بسبب الـ.... (يقول رأيه الشخصي يعني ) يبقى كدة كسر قوانين اللعبة ، لأن الآراء مالهاش مكان تحت القبعة البيضاء .
القبعة البيضاء يعني حقائق مثبتة ونتائج دراسات محددة ، وبعيدة كل البعد عن وجهات النظر الشخصية )

 

ولو أنت الشخص الذي يطلب المعلومات عليك ان تستخدم "الأسئلة التركيزية" من أجل الحصول على المعلومات المطلوبة فقط دون زيادة او نقصان .

• وعشان نبقى فاهمين ازاي نوصل للحيادية دي ونقول "الحقيقة" .. لازم نعرف معلومة مهمة .. ان الحقائق لها تصنيف

وضع ادوارد دي بونو نظام ثنائي الطبقات Tow-lier System للحقائق فأصبحت هناك :

1. حقائق اعتقادية Believed Facts : مثال على ذلك

     "أعتقد ان تشرشل كان معجب معجباً فى السر بهتلر"

 

2. حقائق تم فحصها Checked Facts : مثال على ذلك

 

"يمكننى أن أقول أن الأجيال الجديدة من طائرات البوينج 757 أكثر هدوءً في تشغيلها من الأجيال السابقة من نفس نوع الطائرات"

 

هناك بعض العبارات التوضيحية التي يسمح باستخدامها فى ظل ارتداء القبعة البيضاء مثل "دائماً يصدق هذا" ، "لايصدق هذا أبداً" ، "عموماً" ، "أحياناً" ، ولكن بشرط ان تقدم تحت العنوان السليم ، فهناك "حقائق اعتقادية" ، "وحقائق تم فحصها" وأيضاً "النوادر" و"الحكايات " وغيرها ..

 

(وفى الآخر نقدر نقول ان احنا بنستخدم القبعة البيضاء عشان نفرغ الحقائق كلها وتبقى واضحة قصادنا .. زي ما الواحد بيفضي اللى في جيبه أو شنطته عشان يشوف فيها فلوس قد ايه .. وبعد كدة (باستخدام القبعات التالية) يشوف هيتصرف فيها ازاي )

بكدة نكون وضحنا يعني ايه قبعة بيضاء وبنستخدمها ازاي و ليه ..

ان شـــــــــــاء الله نكمل المرة الجاية ....

هنتكلم على القبعة الحمراء بإذن الله

فى انتظار التعليقات (أياً كانت) وشكراً جزيلاً

السلام عليكم ورحمة الله وبركاته

قرأت لكم ..

السلام عليكم ورحمة الله وبركاته

كتاب النهاردة كتاب مختلف .. شيق وجديد .. صحيح تحقيق اللى فيه محتاج شوية مجهود ، بس بجد لو عملنا بيه هنقدر "نـــاخـــد قــــرار سلــــــــيم" مبنى على أسس سليمة وتفكير شامل لكل جوانب الموضوع اللى محتاجين ناخد فيه قرار .

الكتاب اسمه  " قبعات التفكير الست "  

للمفكر "ادوارد دي بونو" ..

دي بونو هو صاحب مؤسسة "كورت" CORT وهى الأحرف الأولى من "Cognitive Research Trust" اي "مؤسسة بحوث الادراك" وهي مؤسسة ترعى تطبيق برنامج (هو الذي وضعه أيضاً) يستخدم فى بعض المدارس الاجنبية لتعليم الطلاب كيفية التفكير بشكل واع ومدروس ووضع خريطة تفكيرية شاملة ..( لما نتعرف على القبعات الستة وكيفية استخدامهم هنعرف نعمل خريطة تفكير شاملة لأي موضوع يقابلنا) 

• علشان نقدر نطبق اللى هنعرفه عن القبعات الستة لازم نعرف معنى مهم وهو :

"التقمص" ..

يقول الكاتب "اذا تقمصت دور المفكر فستكون كذلك "

اذا رأيت تمثال المفكر لـ (رودين) وقمت باتخاذ نفس وضع هذا التمثال (فى الصورة الموضحة) فسوف تصبح مفكراً ..


وهذا لا يعني انك اذا جلست هكذا سوف تصبح مفكر بعد خمسة دقائق .. ولكن الفكرة هنا فى أنك اذا فعلت ما يفعله المفكرون وبداخلك ارادة قوية لكي تكون مثلهم فستكون مثلهم .
(والمعنى دة واضح جداً فى الصلاة .. اياً كان ديننا احنا مفروض علينا نصلي .. صلاتنا عبارة عن بعض الحركات الجسدية الظاهرة ، مش بنعيش جواها ونخشع ونبقى مصلين فعلاً ظاهراً وباطناً الا لما نؤدي الحركات الجسدية كما ينبغي . ودة بيأكد كلام ادوارد دي بونو .. يعني لو عشت دور المفكر ظاهرياً واردت انك تكون زيه من جواك .. هتبقى زيه) .

• كلمة "قبعة" هنا تعني دور معين يقوم به من يرتديها .. فمع كل قبعة سوف نقوم بدور مختلف نرى من خلاله زاوية مختلفة ونناقش جانب محدد للموضوع محل المناقشة .

(وهنشوف قد ايه استخدام القبعات شيق ومفيد من حيث انه طريقة للتفكير جديدة ودمها خفيف ، وكمان من أثناء تطبيقه انت بتدي أجازة لـ "ذاتك" وبتغير طريقة تفكيرك التقليدية )

الغرض الحقيقي من تطبيق هذه الطريقة فى التفكير هو الوصول الى "التفكير الواعي المدروس" .. وهو عكس التفكير الأوتوماتيكي الذي نستخدمه طوال الوقت (أثناء التنفس ، السير ، القيادة ... )
وبذلك ننتقل من مرحلة "فكر رد الفعل" الى مرحلة أرقى فى التفكير وهي "فكر الفعل"

(يعني بدل ما نبقى دايماً بنتصرف على أساس تصرفات غيرنا (ونبقى أتباع يعني) نبقى احنا قادة المواقف وقادة أنفسنا ونكون احنا الفاعلين )

كفاية عليكم كدة النهاردة

ان شــــــــــــاء الله بكرة نبدأ نعيش مع القبعات الستة ..

السلام عليكم ورحمة الله وبركاته

 

 

مريم مين ؟

السلام عليكم

احب اولا اعرفكم على نفسي قبل ما ابدأ

انا أمة الله "مريم كفراوي" .. بشتغل محاسبة حتى الآن .. أحب ما أعمل حتى أعمل ما أحب .. وأحب انى اعمل كمدربة تنمية بشرية

أخدت شوية كورسات فى التنمية البشرية والانجليزي والكمبيوتر وحاجات تانية لا بأس بها وبعلم نفسي بنفسي حالياً والله المستعان .. النتيجة انى دلوقتى مدربة تنمية بشرية معتمدة من اكاديمية بناة المستقبل الدولية ومن جامعة كولومبوس بانجلترا ..

عملت الأكاونت دة عشان ابدأ رحلتى فى انى استفيد وأفيد غيري ابتغاء مرضاة الله أولاً وأخيراً وعشان اقصر المسافات على اللى ما بيحبش الكتب والمذاكرة .. هدي له كبسولات

بإذن واحد أحد كل ما هقرأ او اتعلم حاجة جديدة هنشرها ولو أسلوبها كان صعب هحاول ابسطها قدر الامكان (هكتبها بالشعبي من الآخر) وكل ما اعمل محاضرة لو ماعرفتش ارفع الفيديو هكتب محتواها 

وفى انتظار التعليقات والمقترحات وكل اللى فى نفسكم سواء كان ايجابي او مش ايجابي  

ادعولي وهدعيلكم وربنا ينفعنا ببعض دائماً وأبداً ..

والسلام عليكم ورحمة الله وبركاته

أنت تملك ذاكرة رائعة ولكن لا تستخدمها

أنت تملك ذاكرة رائعة ولكن لا تستخدمها

عفوا ذاكرتك ليست ضعيفة ولكن تفتقد شيئاً من التدريب وليست ضعيفة .

تجربة

هذه تجربة بسيطة لأربع مجموعات لكي تقرب لك الفكرة وفرصة لاختبار ذاكرتك :
حاول أن تتذكر هذه المجموعة من الحروف في دقيقتين. ” ب ك ج أ ، ث ر ل ، و ح ، ش ز م”
لعلك تجد صعوبة في تذكر هذه المجموعة البسيطة ؟
ثم حاول أن تتذكر المجموعة الثانية: ” هام ، خوف ، فكرة ، نفسيا ، ضوضاء ، فراغ ، وزن”
المجموعة الثالثة: ” تفاح ، ساعة ، كلب ، منضدة ، قطة ، كمبيوتر ، تي شرت”
المجموعة الرابعة: ” موقع بلا حدود يجعل ذاكرتك خارقة ”
بلا شك انك تجد سهولة في حفظ هذه المجموعة

لماذا ؟

إن معظم الذين يقومون بهذه التجربة يجدون مشقة في تذكر أحروف المجموعة الأولى ، ولكنهم يتذكرون بسهولة عدداً أكبر من كلمات المجموعة الثانية و الثالثة ، والسبب في ذلك هو أن المجموعة الأولى تحتوي على حروف ليس لها معنى، أما المجموعتان الثانية والثالثة فتحتوي على كلمات ذات معنى ، إلا أن كلمات المجموعة الثالثة تحظى بفرصة أكبر للتذكر لأنها تعبر عن أشياء مادية يمكن رؤيتها بالعين فتتخيلها الذاكرة وتثبت فيها ، على حين أن المجموعة الثانية تعبر عن أشياء معنوية ذات معنى .
أما المجموعة الرابعة فتحتوي على جملة كاملة مفيدة أي ذات معنى مثل: ” موقع بلا حدود يجعل ذاكرتك خارقة “

والآن .. حاول أن تقارن بين المجموعات السابقة وستجد أن كلمات المجموعة الرابعة هو الأقرب لتتذكر لأنها تامة وتعني شيئاً ما ، لذلك فإن الكلمات ذات معنى تكون سهلة التذكر ، وإذا أردت أن تتذكر شيئاً فجعل له معنى واجعلعيناك تراه وعقلك يتخيله، وهذه قاعدة هامة للتذكر.

تدريب الذاكرة

تمرين على تدريب ذاكرة البصر

وأنت في طريقك إلى العمل أو المدرسة ، حيث يمكن أن تمر من أمام نافذة عرض لأحد المحلات التجارية، قف لمدة ثلاثة دقائق أمامها ، وحاول أن تسجل في عقلك الأشياء المعروضة، وطريقة ترتيبها كما تراها، وبعد عودتك إلى المنزل أو أثناء ركوبك احد المواصلات اكتب ما حفظته من الأشياء التي رأيتها في نافذة العرض .. وفي اليوم التالي ، وتوجه على المحل نفسه ، وقارن ما كتبته بما تراه أمامك ، والآن يمكنك أن تعطي لنفسك درجة على أدائك

إذا قمت بإجراء هذا التدريب البسيط باستمرار، فسوف تكتشف أن عينك سرعان ما أصبحت ذات إحساس قوي وملاحظة جيدة

 

منقول من موقع "بلا حدود" http://www.blahodood.com